Med heimel i plan- og bygningslova (PBL) § 19-2 gir teknisk utval dispensasjon frå § 4.2 i føresegnene til arealdelen av kommuneplanen (planID 1516 2017) og kravet til avkøyrsle frå kommunal veg om maksimal stigning 1:8 og utflating 1:25 dei første 5 metrane frå vegkanten, slik at avkøyrsla frå vegkant og fram til garasjeport på nytt garasjetilbygg kan oppførast med stigning maksimalt inntil 1:5 og utflating maksimalt inntil 1:13 mot kommunal veg.
Føresetnaden for å kunne gi slik dispensasjon er at:
Avkøyrsla ikkje blir brattare enn 1:6,5 fram til dei 2 p-plassane som skal etablerast nord for eksisterande bustadhus. Det må etablerast støttemur minst 1 meter frå tomtegrense mot offentleg veg i denne samanheng. Støttemur kan vere søknadspliktig (jf. SAK10 § 4-1 m/ veil.) og må i så fall omsøkast og godkjennast etter PBL kap. 20 som del av tiltaket elles, før utføring.
Varmekablar må etablerast i avkøyrsla som er brattare enn 1:8 og utflating av avkøyrsle mot offentleg veg brattare enn 1:25.
Grunngivinga for å kunne gi dispensasjon er at dispensasjonen ikkje vesentleg vil sette til side intensjonen bak føresegna og at fordelane er klart større enn ulempene ved å gi dispensasjonen:
Eigedomen er utbygt med eit eldre bustadhus, som gir ein etablert situasjon i høve høgdeplasseringa for eksisterande bustadhus og plassering av avkøyrsle til kommunal veg. Eigedomen er del av eit eldre, etablert og sentrumsnært bustadområde.
Tiltaket er knytt til hovudombygging av eksisterande eldre bustadhus, men med gjenbruk av store delar av eksisterande bustadhus noko som er i tråd med dagens mål om berekraft.
Høgdenivå for eksisterande bustadhus legg føringar for høgdeplassering av garasjetilbygget og delvis også biloppstillingsplassane.
Ved plassering av 2 p-plassar nord for bustadhuset - som vist på situasjonsplan datert 18.10.2024, sist revidert 19.11.2024 - vil parkeringskravet om 2 p-plassar vere oppfylt for eigedomen. Avkøyrsla vil her ikkje bli brattare enn maksimalt 1:6,5.
Del av avkøyrsle fram til nytt garasjetilbygg med stigning brattare enn 1:8 og utflating 1:25 skal utførast med varmekablar og høve til oppvarming vinterstid. Dette tiltaket vil kunne sikre tilkomst til garasjedelen og p-plassar også ved glatt føre.
Samla sett blir talet på p-plasar dobla frå 2 til 4 p-plassar for eigedomen. Behovet for gjesteparkering i gata blir dermed redusert og sikrar betre tilkomst / avkøyrsle / parkering på eigedomen og tryggare trafikkavvikling i kommunal veg.
Ved ny avkøyrsleløysing og garasjetilbygg vil ein også lettare kunne unngå rygging ut i kommunal veg, slik det er i dag.
Endra avkøyrsle og plassering av nytt garasjetilbygg, vil ikkje medføre brattare tilkomst fram til garasjeport enn for eksisterande frittliggande garasje.