Innsparing for 2026 - driftstilpassing

Formannskapet tek saka til vitande

Vedlegg

Tokke Sp, MDG og KrF kjem med fylgjande framlegg:

1.

Tokke kommunestyre ber administrasjonen i budsjettet om å legge fram sak om justering av talet på institusjonsplassar til mellom 20-24 plassar. I saka skal det vurderast om vi bør auke talet på kortidsplassar frå dagens 5 plassar til 8-10 plassar og redusere talet på langtidsplassar tilsvarande. Ei justering av talet på institusjonsplassar bør gjerast over ein periode på 2-3 år.

I saka bør det vurderast om heimesjukepleia bør styrkast dersom ein reduserer talet på institusjonsplassar.

2.

Tokke kommunestyre ber administrasjonen i budsjettet koma med framlegg til mogleg reduksjon av driftsnivået av bufellesskapet.

3.

Tokke kommunestyre ber administrasjonen i budsjettet kome med framlegg til reduksjon av driftsnivået for planområde 5 teknisk. Det bør sjåast på stillingar innanfor teknisk drift, utbygging, vedlikehald og reinhald, utgifter til maskiner og maskinplan. Framlegget til reduksjon skal skje utan å avhende fast eigedom. Det bør og vurderast å justere modellen for reinhald for ulike kategoriar bygg, slik at ein kanskje kan gjera reinhald i nokre bygg/delar av bygg med redusert frekvens.

4.

Tokke kommunestyre ber administrasjonen i budsjettet orientere litt nærare for kostnader for avdeling for psykisk helse og rus, talet på brukarar, kva for oppgåver som psykisk helsehjelp gjer mv.

Rask Psykisk Helsehjelp hadde i 2024 om lag 27 brukarar frå Tokke. Var dette enkeltbrukarar eller inkluderer det også gruppesamlingar? Kor mange timar med konsultasjon fekk dei 27 brukarane til saman i 2024? Kor mange brukarar har vore i kontakt med Rask Psykisk Helsehjelp i 2025 og kor mange timar konsultasjon har dei fått?

Bakgrunn

Planområde 3 Helse og omsorg

I rekneskapet for 2024 blei det bruka om lag 109 MNOK innanfor Helse- og sosialområdet. Det var ca. 10 MNOK over budsjettet som blei vedteke i desember 2023.

I 2018 var netto driftsutgifter på ca. 76 MNOK. I 2024 var netto driftsutgifter på om lag 109 MNOK. Prisstigninga frå 2018 til 2024 har vore på om lag 23,3 %. Det utgjer ein auke på ca. 17 MNOK. Planområde Helse og omsorg har såleis blitt tilført om lag 16 MNOK utover prisvekst. I 2018 hadde planområdet om lag 93 årsverk, medan det i 2024 hadde 109 årsverk. Det har såleis vore ein vekst i årsverk på 16 årsverk i perioden.

I perioden 2019 til 2024 har det også blitt investert over 70 MNOK i helse og omsorgsetaten. Det har mellom anna gått til nytt kjøken, oppgradering av avdeling A og B samt 10 nye omsorgsbustader. Rente og avdragskostnadene på desse investeringane blir kostnadsført på utanfor budsjettet til planområdet Helse- og omsorg.

Helse- og omsorgsetaten er delt inn i fire einingar. Det er heimesjukepleie, institusjon, bufellesskap og kjøken.

Tokke har 28 plassar. Av desse er 5 kortidsplassar og 23 langtidsplassar. I tillegg leiger vi ein KAD-plass i Vinje. Leigeavtalen for denne plassen blir avslutta ved årsskiftet.

I Tokke kostar kvar institusjonsplass over 2 MNOK netto per år, som er i underkant av kr 6000 per døgn.

Det kan spørjast om ein bør ha fleire kortidsplassar og færre langtidsplassar. Kommunebarometeret for 2024 blei publisert i august 2025. Under helse er det eit målepunkt knytt til kortidsplass. I teksten heiter det fylgjande om Tokke kommune:

«Andelen av opphold på sykehjem som er kortidsopphold

I gjennomsnitt er 17,92 prosent av oppholdene på sykehjem i Norge kortidsopphold. Andelen har vært ganske stabil de siste årene. Andelen opphold som er kortidsopphold i Tokke er på 11,74. De beste kommunene ligger på 100,00 prosent.»

Karakter Tokke: 2,1 (av 6)

Plassering 271 av 356 kommunar.

Det viser at ein på kommunebarometeret får god plassering hvis kommunen har mykje bruk av kortidsplassar.

Det går fram av driftsanalysa i saka at det er om lag 140 personar over 80 år i Tokke. Vi har 28 plassar på sjukeheimen. Det gjev ein dekningsgrad på om lag 20 %.

Gjennomsnittleg dekningsgrad i Noreg ligg på om lag 16 %. I Vestfold ligg den på omlag 13,5 % og det finst fleire kommunar med dekningsgrad på under 10 %.

Dersom vi i Tokke skal legge oss på snittet tilseier det om lag 22-23 institusjonsplassar.

Tokke kommune bruker mindre enn snittet innanfor kostragruppe 6 på heimesjukepleie, medan vi bruker meir enn snittet på institusjon og bufellesskap, jf. bakgrunnsdokumentet side 28.

Institusjonsplassar må også sjåast i samanheng med omsorgsbustader og heimesjukepleie. Har ein mange omsorgsbustader av god kvalitet, kan ein kanskje klare seg med færre institusjonsplassar.

I Tokke har vi 47 omsorgsbustader, jf. driftsanalysa side 35. Det er 15 på omsorgssenteret, 10 nye som blei ferdigstilt i 2024 og 9 ved omsorgssenteret, 10 i Høydalsmo og 3 på avdeling J på helsesenteret. I tillegg er det 7 bustader knytt til bufellesskapet og 2 bustader til psykisk helse.

Dei 15 bustadene på omsorgssenteret har fast heildøgns tilsyn med eiga nattevakt. Men nattevakt frå omsorgssenter/institusjon skal rykke ut til dei andre omsorgsbustadane, og alle andre heimar, dersom brukaren har vedtak på helse- og omsorgstenester på natt og/eller har vedtak om og utløyser tryggleiksalarmen sin.

Planområde 5 teknisk

Planområde Teknisk hadde i 2017 eit budsjett på om lag 19 MNOK. I 2023 var budsjettet på om lag 33 MNOK. I perioden 2017 til 2023 har prisveksten vore om lag 23 %, noko som tilsvarar ein auke på ca. 4,3 MNOK. Planområde teknisk har såleis fått ein auke på om lag 10 MNOK utover prisveksten i perioden. I 2017 var det om lag 33 årsverk innanfor planområde teknisk. I 2024 er talet på årsverk 42, noko som tilsvarar ein vekst på 9 årsverk.

Vedlegg

Opposisjonen gjeng for Kommunedirektøren sitt forslag, men signaliserer nå at ein kan ta ut desse punkta:

1. Ynskjer ikkje samanslåing av HSU og OKI Kan sjå på andre innsparingar politisk, men ynskjer ikkje å svekke demokratiet ytterlegare ved at færre får delta i utval
2. Driftstilskudd private fysioterapeuter Uforutsigbart å drive i Tokke og det er eit særs viktig forebyggjande tiltak. Årsmelding syner at dei jobbar mykje og har stor pågang og lang ventetid
3. Diabetessjukepleiar Blitt kutta i forhold til behovet tidlegare. Dette er ei alvorleg diagnose som fortjener god oppfølging og hjelp til rett medisinering
4. Støtte til private grendehus Dette er ein liten kostnad i forhold til aktivitetsnivået det skapar i bygdene. Husa er også disponible for private arrangement som er eit behov

Grunngjeving:

Me ser ikkje for oss korleis me skal klare å spare ca. 20 millionar kroner utan å arbeide vidare med forslaga som kommunedirektøren legg fram. Ynskjer derfor å jobbe vidare med resterande punkt fram mot budsjett, då ein veit meir nøyaktige overføringar frå staten og me har hatt ein grundig gjennomgang av investeringsbudsjettet, der me ser på aktiverte og ikkje aktiverte prosjekt.

Vedlegg